［德國傳統工業危機系列］好嘢不妨一寫再寫
FT年頭嘅文，相當精彩，叫得The Big Read ，梗係長文（https://on.ft.com/2KRDcAm）。講蘋果效應：德國錯過科技轉型
1. 最初嘅故事，舊文都寫過。1997年，教主回歸蘋果，當時蘋果市值30億美金，係德國西門子嘅十份一—當時西門子係歐洲最大工業股，而家都係。25年不夠,，而家蘋果市值係10000億美金，唔止大過西門子多好，其實大過德國DAX指數三十間公司夾埋。驚未？
2. 舊文寫過，DAX入面，就係傳統工業股多（https://bit.ly/3fh6Blq）。好多都老字號：Adidas，Allianz安聯，Bayer拜耳藥廠，BASF，寶馬，Daimler，德意志銀行，德國交易所，漢莎航空，德國郵政DHL，德國電訊，Merck藥廠（原來同美國分咗家！），慕尼黑再保，軟件公司SAP，西門子，福士汽車
3. 當然，股價嘅嘢有上有落。但，廿五年喎。況且你睇純利，蘋果一間都等於DAX30間嘅三份二左右，分分鐘會過頭。無論如何係一葉知秋，反映到德國嘅困境—經濟唔差，但將來點算？競爭優勢在邊？本世紀嘅tech boom，德國似乎係錯過晒。
4. 當然德國人唔係傻的，當然係知道問題，N咁多CEO都知道唔改變就死路一條。可能五年，可能十就畀人淘汰。你睇Nokia（未死，但已唔係嗰回事，蘋果一年嘅現金夠買起N咁多間），你睇SONY（同上，三星電子手上嘅現金多過SONY成間公司市值）。
5. 本來，美資（to a lesser extent，中資）Big tech無堅不摧，唔係新鮮事。例如蘋果一間嘅市值，多過澳洲ASX200指數200隻加埋。但德國情況唔同，德國唔係澳洲，歐元區最大經濟體系，全球第四大。而帶動德國二戰後（嘩，太公嗰代，新一代無感）經濟奇蹟嘅，正係工業，大量生產，工程技術。直到近年，軟件，平台，互聯網，數據之類開始改變世界。
6. 呢個一間蘋果頂30間德國頂尖公司嘅現象，畀你見到德國企業家最擔心嘅兩樣嘢。第一，盈利同出口依然強勁（＊），但佢地擔心軟件同數據嘅新時代會淘汰佢地。有人認為，德國在電子商貿，物聯網，AI等等領域，全部都係落後於人嘅
7. 第二，就係擔心美資（to a lesser extent，中資）公司太強勢，會食埋佢地，仲會侵佔德國核心工業。大家已經見到科技如何顛覆音樂，媒體等等行業，Facebook上市唔夠十年，已經將傳統媒體趕上絶路。咁德國傳統嘅強勢項目，機械化工等等，會唔會都被人趕絶？
8. 最明顯見到嘅，當然係汽車行業。好多人聽到德國就係諗起汽車，汽車位咗國三份一嘅研發開支。五年之前，話德國車廠會不敵美國，一定人唔笑夠都吠。但舊文都寫過（https://bit.ly/3dg6Ewd），家陣Tesla市值係福士double，但福士出車多30倍。問題唔止係邊個造車勁啲邊個性能好啲工藝精啲，甚至唔只係電動車同傳統車嘅分別，而係成個business model—傳統德國車要畀dealer，Tesla直接賣畀個客。唔只係慳錢，而係直接將架車變成好似智能裝置咁，好似iPhone咁。投資者抽注呢種方式先係將來云云。當然Tesla而家都係唔多賺錢嘅
9. 總理默克爾都講，拿，只賣產品唔夠架，要用啲data再整啲新產品—而家先知？遲咗有冇十年？
10. 例如車嘅例子，自動駕駛要機器學習，但德國並冇像樣嘅軟件工業（只得一間SAP），所以德國車廠，一係同美國合作，一係要同中國合作。
11. 另外，跨領域發展，呢味嘢，亦都唔係德國傳統強項。BMW就係造車，以專注出名。但蘋果賣完電話又賣MP3又賣平板，仲要慢慢利用數據同個生態圈玩其他服務。信用卡啦，電視啦，音樂啦，電影串流啦。亞馬遜嘅情況亦差不多，由賣書變成乜都賣，仲有Web Service，又做實體超市，又做外賣，又拍戲。
12. 篇幅所限（你地嘅耐性），不一一細講。但例如德國嘅藥廠擔心health care 會uber化，拎數據嗰個先係霸主，唔係造藥嗰個。物流運輸，就更加見到係亞馬遜直接交手。德國企業家似乎都抱怨美國企業以本傷人搶市場（哈哈），等於畀白粉啲客食：你免咗運費，咁啲客以後就唔肯畀運費了，咁其他公司更加難搵食。
13. 問題出在邊？似乎唔係市場（德國有龐大嘅內需市場，仲有歐盟單一市場，其他國家德國貨要出口亦有口碑），唔係文化，亦唔係人材—明明德國大學依然出到好多勁嘅學者工程師之類
14. 所以，問題嚟了，萬惡嘅，錢。多數Tech撚唔鍾意講錢（但又想要錢），鄙視啲只識睇錢嘅金融撚。但正係因為德國，甚至全個歐洲（英國好啲）都冇呢種融資創投嘅配套。所以歐洲出唔到中國美國甚至印度嘅Tech公司。
15. 一年前唔夠，舊文都寫過（https://bit.ly/3bZehHb），當時我講德國創科落後，朋友好不滿（其實係好撚不滿），同我講HI FI 線呀靚車呀之類，更話我唔係有錢人識閪（原文照錄）。但市場唔呃人。445間獨角獸公司（估值過10億美金嘅未上市公司），美國兩百幾間，中國100間，英國24間，德國12間 – 同德國嘅經濟實力完全不成比例（順便講埋，日本係得3間，但韓國有10間，日本嘅情況同德國都有啲似）
16. 冇錢，梗係萬萬不能。冇錢你間嘢點壯大？邊度搵錢？就算搞得起，好快畀人抄，或者成間買起你。又或者搵你啲人過去。我間嘢美國上到市，個個變千萬富翁喎。你本土嗰間呢？
17. 亦都有話，德國人嘅投資文化保守（某程度上係），寧願買國債都唔買股票。某被訪者講得好正：「都戇居！買意大利國債，大風險過買start up好多啦」，而我都有舊文寫過，正因為全球低息，保守嘅德國投資者都焗賭，更加多買股票（https://bit.ly/3d9i1G7）
18. 當然，正面啲睇，德國經濟仲係相當強勢—固然篇文寫嗰時係1月，而家就兩個世界，德國經濟當然都會收縮，但都係比其他歐洲國家好。出口優勢依然係勁嘅。其中一個關鍵，就係出口去最大貿易伙伴—中國，嘻。不過，中國亦係德國嘅對手。美國嘅情況講咗，中國亦都不甘於一路在生產鍊嘅最下層，而中國本土亦都有強勁嘅科企。
（＊）留意篇文係1月，當時未環球股災，舊年DAX升兩成創新高—不過蘋果升一個開。
———————
版務：收費專欄已推出，支持埃汾高質文章。幾舊水睇三個月，一星期三篇
請去呢度訂：bit.ly/2wVXndj
課程編號填: CC01
科咗水後後有Login及Password畀你
逢一三五入去 homebloggerhk.com （見到就睇到《事先張揚》），亦睇得返以前嘅文。一般我都係會黃昏出文嘅。
Search